Сонгинохайрхан дүүрэгт Нийслэлийн төсвийн хөрөнгөөр барьсан “Толгойт хөгжлийн төв” өнөөдөр нээлтээ хийлээ. Тус төв нь нэгдүгээр давхартаа спорт заал, хоёр, гуравдугаар давхартаа сэргээн засах, уламжлалт эмчилгээ, үйлчилгээ үзүүлэх танхимуудаас бүрдэж байна.
Нэгдүгээр давхар буюу спорт зааланд секц, дугуйлан, тэмцээн уралдаан өглөөний 07:00-17:00 цаг хүртэл цагийн хуваарийн дагуу иргэдэд үнэ төлбөргүй үйлчилнэ.
Секц, дугуйланӨсвөр, залуу үеийн дунд волейбол, сагсан бөмбөг, бадминтон гэх мэт 16 төрлийн дугуйлан секц хичээллэж, Ахмадын шугаман бүжгийн сургалтууд зохион байгуулан, сардаа 150-200, жилдээ нийт 2000 гаруй хүүхэд, иргэд, ахмад настныг хамруулна.
Эмчилгээ Хоёр болон гуравдугаар давхарт “Сонгинохайрхан” жишиг нэгдсэн эмнэлгийн өдрийн эмчилгээний тасгаас харвалтын дараах нөхөн сэргээх болон уламжлалт гэсэн хоёр төрлөөр эмчилгээг иргэдэд түргэн шуурхай, хүртээмжтэй үзүүлэхээр төлөвлөж, өдөрт 35 сард 700, жилдээ 8400 гаруй иргэнийг хамруулна.
Хөгжлийн төвд Сонгинохайрхан дүүргийн толгойт бүсийн 1, 2, 3, 4, 20, 22, 33, 34, 35, 36 дугаар хороодын бүх насны иргэд үнэ төлбөргүй хамрагдана.
Иргэдийн чөлөөт цагаа зөв боловсон өнгөрүүлэх, спортоор хичээллэх, сэргээн засах эмчилгээ авах төв нэгээр нэмэгдэж байгаад баяртай байна. Цаашид Баянхошуу, Төв, Өнөр бүсүүдэд хөгжлийн төвийг барихаар газар чөлөөлөлтийн ажил үргэлжилж байна.
Та системд нэвтэрч орсоноор сэтгэгдэл бичих болон үнэлгээ өгөх боломжтой болно.